Bumi i turistëve në Kroaci përballet me mungesë punëtorësh

turistet.png

Kuotat e ulëta të caktuara për punonjës të huaj dhe kushtet e këqija të punës po fajësohen për mungesë të fuqisë punëtore në sektorin e turizmit në Kroaci.

Nga Sven Milekic, BIRN

Pavarësisht një sezoni të suksesshëm, sektori i turizmit në Kroaci ka një mungesë prej të paktën 2,700 punëtorësh, shprehen sindikatat, duke fajësuar hendekun e krijuar nga pagesa e ulët dhe kushtet e këqija të punës.

Eduard Andriç, kryetari i sindikatës së turizmit kroat dhe shërbimeve, tha për BIRN se “kushtet e këqija të punës janë arsyeja kryesore për mungesën e punëtorëve në turizëm”.

“Arsyeja që kam theksuar për vite me radhë janë rrogat relativisht të ulëta, që bien nën rrogën mesatare, nga 17 deri në 20 për qind,” tha ai.

“Gjithashtu, pavarësisht rritjes rekord gjatë viteve të fundit dhe të gjitha investimeve të bëra, në vend që të zgjerohet numri i punëtorëve me kohë të plotë, turizmi kroat ka ulur vazhdimisht shifrat, ndërsa numri i punëtorëve sezonalë është në rritje,” vazhdoi ai.

Andriç tha se kushtet e këqija të punës i penguan njerëzit të zgjedhin të vazhdojnë karrierën e tyre në turizëm, sepse ata “nuk duan të zgjedhin një profesion ku punojnë vetëm gjashtë muaj në vit”.

Ai tha se kushtet në turizëm mbetën të vështira, pavarësisht disa përmirësimeve të bëra në strehimin e punonjësve të turizmit në bregdet.

Sipas tij, shumë njerëz që përfunduan studimet për turizëm në shkollë të mesme nuk i vazhdojnë studimet në këtë profesion dhe kërkonin punë në sektorë të tjerë.

Një numër i madh kroatësh punojnë me sezone në turizëm, sidomos në bregdetin e Adriatikut gjatë pranverës dhe verës.

Ndërkohë që raportet në qershor treguan për një mungesë prej 2,700 punonjësish sezonalë, Andriç tha se shifra reale ishte ndoshta shumë më e madhe, pasi shumë punëdhënës “nuk e raportojnë problemin”.

Në fund të korrikut, Dhoma e Ekonomisë e Kroacisë, HGK, propozoi prezantimin e modeli slloven të punësimit të punëtorëve të huaj sezonalë në turizëm. Kjo do të lejonte punësimin e më shumë punëtorëve të huaj, por vetëm për punë që punonjësit vendas nuk janë të interesuar.

HGK tha se Kroacia duhet të bëjë “më fleksibël” kuotën e punëtorëve të saj të huaj. Për vitin 2017, qeveria dha vetëm 175 leje pune për të huajt në turizëm.

Davor Stern, një konsulent veteran për energjinë dhe ish-ministër i ekonomisë, tha për të përditshmen Vecernji list se shteti mund ta zgjidhë mungesën duke i dhënë më shumë leje pune njerëzve nga vende si Filipinet që do ta bënin kështu punën për pagesën minimale – rreth 350 euro.

Ndërkohë që disa thonë se punëtorët nga Bosnja fqinje – ku shkalla e papunësisë është e lartë – gjithashtu mund të jenë të interesuar në punë sezonale, si Stern ashtu edhe Andriç ranë dakord se këta punëtorë do të kishin më shumë gjasa të gjenin punë sezonale të paguara më mirë në vende të tjera në BE.

Rreth 150,000 persona në mënyrë direkte ose jo punojnë në sektorin e turizmit në Kroaci, zë 18 për qind të GDP-së vjetore – përqindja më e madhe në Europë.

Rritja e turizmit në gjashtë muajt e parë të vitit 2017 vazhdoi në korrik, me 12 për qind më shumë vizitorë dhe 11 për qind më shumë qëndrime prej një nate sesa në korrik të vitit të kaluar.

Komentet
Top