SHBA me plan për mbrojtjen e Kosovës e të Shqipërisë nga ndikimi rus

0-5.png

Zgjedhjet në disa vende të Ballkanit, por edhe krizat politike në disa të tjera, kanë qenë në fokus të diplomacisë ruse.

Të shumta kanë qenë deklaratat e lëshuara pas zgjedhjeve në Maqedoni. Shumë të ashpra kanë qenë për aderimin e Malit të Zi në NATO. E më e fundit kritikë, për zgjedhjet në Kosovë, transmeton TCh raportimet.

Moska e cilësoi si vijim të radikalizmit të politikës së Kosovës, faktin që fitues doli koalicioni i ish-UÇK-së, me në krye ish-komandantin Ramush Haradinaj.

Por kjo qasje e Moskës, gjithnjë e në rritje ndaj Ballkanit Perëndimor, por edhe në vende të tjera të Lindjes, ka tërhequr sërish në vëmendjen e Senatit amerikan.

Vetëm pak javë pas depozitimit të rezolutës, e cila kërkonte ndalimin e ndikimit të Moskës në zgjedhjet e disa vendeve, përfshi edhe Shqipërinë, një tjetër kërkesë është depozituar pak ditë më parë në Senat.

Bëhet fjalë për një nismë te senatorit demokrat, Benjamin Cardin, i cili i kërkon Senatit marrjen e një sërë masash për ndalimin e ndikimit rus në Europë dhe Euroazi.

Në tekstin e dokumentit, depozituar tashmë në Senat, Cardin kërkon që në buxhetet e viteve 2018-2019, Shtetet e Bashkuara të Amerikës të parashikojnë një buxhet prej 250 milionë dollarësh për të ndaluar ndikimin rus në këto zona.

Në listën e shteteve te rrezikuara dhe që do të duhet të përfitojnë nga ky fond janë Shqipëria, Bosnje-Hercegovina, Gjeorgjia, Maqedonia, Moldavia, Kosova, Serbia dhe Ukraina.

Por cili është qëllimi kryesor? Senatori Cardin parashikon që me këto fonde të asistohet në mbrojtjen e infrastrukturave kritike dhe mekanizmave zgjedhorë nga sulmet kibernetike, në luftën kundër korrupsionit dhe në forcimin e shtetit të së drejtës, duke pasur një sistem drejtësie të pavarur. Po ashtu kërkohet që të rriten kapacitetet e shoqërisë civile, medieve, organizatave joqeveritare, kundër rritjes së ndikimit dhe propagandës së Federatës Ruse në disa shtete./T-Ch

Komentet
Top